Шек за дебелиот Дончиќ: Подобар е од 99,9% од НБА бековите

Лука Дончиќ е главна тема на американските медиуми по најголемиот трејд во НБА во последните триесет години, во кој Словенецот стана член на Лос Анџелес Лејкерс.

Таму беше трејдуван од Далас Маверикс, а ESPN објави дека една од причините е тежината на Дончиќ, која наводно изнесува 122 килограма.

За многумина оваа приказна нема апсолутно никаква смисла бидејќи Дончиќ и претходно имаше вишок килограми, па сепак стана од најдобрите кошаркари во светот. За ова зборуваше и легендарниот Шекил О'Нил.

„Треба да знам кој е точниот термин. За што зборуваат? Кога ќе речете вон форма, дали е дебел? Зборуваме ли за телесни маснотии?“, се праша популарниот Шек.

„Дебелиот Лука Дончиќ е подобар од 99,9% од сите бекови во НБА“, додаде тој.

Шек, кој и самиот добиваше критики за прекумерната тежина во текот на кариерата (со 216 сантиметри тежеше околу 150 килограми), се присети како не тренирал во текот на летото затоа што имал обврски - семејство, деца и слично. Подоцна, за време на претсезоната и самата сезона, тој постигнуваше идеална форма.

„Тоа беше мојот метод, ми функционираше“, се присети О'Нил, а она што е исто така интересно е што легендарниот центар рече дека верува дека Далас Маверикс се победници на трејдот што го шокираше светот и дека профитирале најмалку во следните две години.