Со ран гол и со играч помалку македонскиот претставник успеа да триумфира на гостувањето кај Ботошани и да ја продолжи европската авантура и тоа со мегдан против Тотенхем.
Уште во 2. минута Бесарт Ибраими со одличен лоб од страна го шокираше домашниот тим носејќи водство за Шкендија.
„Црвено-црните“ од Тетово потоа успешно ги спречуваа налетите на Романците, а кога нема да успееја тука беше голманот Костадин Захов.
Пех за Шкендија се случи во 67. минута кога Арменд Алими поради втор жолт картон мораше да го напупшти теренот, но и со играч помалку македонскиот тим успеа да ја задржи предноста.
Кај домашниот тим во стартниот состав се најдоа двајца македонски фудбалери: Стефан Ашковски беше заменет на полувреме, додека Давид Бабунски играше до 79. минута.
За Шкендија настапија: Захов; Павиќ, Бејтулаи, Кривак, Мурати; Дита, Алими (к); Дориев (70' Нафиу), Тотре (75' Зејнулаи), Ахмеди; Ибраими (88' Мерџани).
Сега Шкендија во 3. коло ќе игра против премиерлигашкиот гигант Тотенхем кој имаше многу проблеми на гостувањето во Пловдив кај Локомотив. Тимот на Жозе Мурињо во 71. минута прими гол, но потоа пред крајот со два гола направи пресврт и победи 1:2.
Бидејќи жрепката одлучи победникот од Ботошани и Шкендија да биде домаќин во наредното коло, тоа значи дека Тотенхем доаѓа во Скопје. Штета што ќе се игра без публика...