„Русија нема потреба да користи нуклеарно оружје во Украина“, изјави министерот за одбрана Сергеј Шојгу, негирајќи ги пишувањата во медиумите дека Москва може да распореди нуклеарно или хемиско оружје во конфликтот.
Во текот на Меѓународната безбедносна конференција во Москва, Шојгу појасни дека од воена гледна точка, нема потреба Русија да користи нуклеарно оружје за да ги постигне целите во Украина.
„Главната цел на руското нуклеарно оружје е да одврати нуклеарен напад“, вели тој.
Ги обвини медиумите дека шират шпекулации за наводна употреба на руско нуклеарно оружје во текот на „специјалните воени операции“ во Украина.
„Сите тие напади со информации се апсолутна лага“, потенцира Шојгу.
Тој смета дека САД и Велика Британија ги планираат украинските воени операции и дека НАТО повеќекратно го зголеми бројот на своите сили во источна и централна Европа.