Американската администрација смета дека нападот со беспилотно летало врз Кремљ на почетокот на мај го извршила украинската разузнавачка агенција, објави The New York Times повикувајќи се на извори.
Според њујоршкиот весник, „американските разузнавачки агенции не знаат која единица го извршила нападот“, а не е јасно дали украинскиот претседател Володимир Зеленски бил запознаен за операцијата.
The New York Times наведе дека „некои американски функционери првично мислеле дека нападот бил организиран од руската влада“, но дека по нападот „САД пресретнале разговор во кој се слушаат руски претставници како зборуваат за прелиминарната истрага на Москва за нападот“.
„Во тие разговори руските функционери изгледаат изненадени од упадот на дронот и ја обвинуваат Украина. Американските власти рекоа дека ова разузнавање им помогнало да се уверат дека нападот не го извршиле Русите“, пишува американскиот весник.
Прес-службата на рускиот претседател објави дека Украина во раните утрински часови на 3 мај се обидела да ја нападне резиденцијата на Владимир Путин со дронови и дека руската армија успешно неутрализирала две беспилотни летала кои го таргетирале Кремљ и дека Путин не е повреден.
