Шпецле е старо јадење кое се прави од тесто, а може да се јаде и во солена и во блага варијанта. Ова јадење домаќинките во Југославија често го служеле, а денес речиси никој ниту го знае ниту го пробал.
Се работи за традиционално германско јадење (Spätzle) од регионот Швабија кое некогаш ширум Југославија било често подготвувано. Шпецлите се замена за тестенини и можат да се служат на најразлични начини, а подготовката е многу едноставна, како што се и евтини состојките.
Потсетува на подготвување кнедли за супа, а може да се служи како замена за шпагети, како додаток за месо во сос, со гулаш, со кашкавал... Дури постои и блага варијанта на ова јадење, па може да го послужите со мак, ореви, чоколадо... Југословенските домаќинки знаеле што е добро, па ова јадење често се наоѓало на трпезите ширум старата држава.
Потребни состојки:
- 3 јајца
- 3-5 лажици брашно
- прстофат сол
Подготовка:
Изматете ги јајцата и постепено додавајте брашно бидејќи смесата не смее да биде премногу густа. Тестото треба да биде погусто отколку она за палачинки, а многу поретко од она што се прави за резанки за супа. Над тенџере со провриена вода поставете ренде и со лажица турајте од смесата и потоа полека повлекувајте низ дупките за да направите шпецли и тие да паднат во водата. Доколку имате округло ренде, ставете го над тенџерето и на ист начин ставајте и рендајте го тестото. Сварените шпецли ќе испливаат на површина, потоа процедете ги, прелијте ги со масло, промешајте и поклопете. Постапката повторувајте ја додека не го потрошите тестото.