Медот како додаток во исхраната може да го направи речиси секое јадење повкусно - од печено пилешко и риба до леб и десерти.
Ново истражување покажа дека медот исто така може да го подобри нивото на шеќер и холестерол во крвта, иако некои видови може да бидат подобри од другите, пренесува Eat This.
Истражувачите од Универзитетот во Торонто, чии резултати од студијата неодамна беа објавени во Nutrition Reviews, одлучија да утврдат какво влијание може да има медот врз кардиометаболните фактори на ризик.
Истражувачите се фокусираа на 18 контролирани испитувања во кои беа вклучени повеќе од 1.100 учесници и траеја два месеци. Резултатите покажале дека консумирањето мед има позитивно влијание врз кардиометаболичкото здравје, како што е намалувањето на нивото на шеќер и холестерол во крвта.
Кај учесниците кои консумирале во просек по две лажици мед секој ден, забележано е дека сировиот и цветниот мед се причина за многу здравствени придобивки. Од друга страна, преработениот мед не бил толку ефикасен.
„Овие резултати се изненадувачки бидејќи медот содржи околу 80 проценти шеќер, па можеби нема смисла нешто толку слатко да го намалува шеќерот во крвта и нивото на холестерол. Но, медот е исто така комплексен состав од обични и ретки шеќери, протеини, органски киселини и други биоактивни соединенија кои имаат голема веројатност да имаат здравствени придобивки“, објаснува Таузеф Кан, истражувач на споменатата студија и истражувачки соработник за нутриционистички науки на Универзитетот во Торонто.
