Шеќерот во крвта е главен извор на енергија на секое тело, а го црпи од храната и пијалаците.
Кога јадете храна или пиете нешто што содржи јаглехидрати и калории, шеќерот во крвта обично расте. Кога пиете алкохол, шеќерот во крвта може да порасне или да опадне. Дали ќе порасне или ќе опадне зависи од тоа што пиете, колку пиете и како вашето тело реагира на алкохолни пијалаци, пишува Eat This, Not That.
Некои истражувања покажаа дека возрасните луѓе со дијабетес кои умерено консумираат алкохол можат да забележат благо подобрување на својата чувствителност на инсулин. Во повеќето случаи, прекумерното пиење алкохол може да предизвика штетен пад на шеќерот во крвта.
Причината за тоа лежи во една од примарните задачи на црниот дроб – производство и ослободување на глукоза во крвотокот за да се помогне во рамнотежата на шеќерот во крвта.
„Консумацијата на алкохол го нарушува овој процес и вашиот црн дроб и понатаму дава предност на преработката на алкохол наместо на ослободувањето глукоза, што може да доведе до низок шеќер во крвта“, објаснува нутриционистот Вандана Шет.
Кога шеќерот во крвта е пренизок, вашите клетки немаат доволно енергија. Тогаш, луѓето се чувствуваат слабо, гладни се, нервозни, а понекогаш се појавува и главоболка. Ниското ниво на шеќер во крвта може да предизвика ослободување на адреналин кој предизвикува забрзана работа на срцето, потење, тресење и мачнина. Ако продолжи падот, а црниот дроб не испраќа глукоза во крвотокот, човекот може да почувствува збунетост, нејасно да зборува, па дури и да добие напади. Во многу ретки случаи можно е да дојде со смрт.
Консумацијата на алкохол може да предизвика ненадеен пораст на шеќерот во крвта, тоа често се случува кога пиете слатко вино или пиво, бидејќи станува збор за пијалаци богати со јаглехидрати. Истиот ефект го имаат и коктелите кои содржат шеќер, сода или овошен сок.
Алкохолните пијалаци често отвораат апетит за чипс, пица, печива или друга храна богата со јаглехидрати, што може да го направи падот и растот на шеќер во крвта уште поизразен.