Русија вчера ја регистрира првата светска вакцина против коронавирусот. Што знаеме за неа, за каква вакцина станува збор?
Вакцината е развиена од рускиот Национален истражувачки центар Гамалеја, а во процесот на нејзиното создавање се користени мртви честички на база на аденовирус. Директорот на институтот, Александар Гинцбург истакна дека нема потреба за загриженост по здравјето, бидејќи овие честички во вакцината не можат да се размножуваат.
Клиничкото име на вакцината е Gam-COVID-Vac Lyo, но е наречена Sputnik V, по првиот вештачки сателит од 1957 година.
Како минаа клиничките испитувања?
За сега официјално се објавени резултатите само од првата фаза на клиничкото испитување на вакцината која почна на 17 јуни, а во неа учествуваа 78 луѓе од кои 38 примија вакцина.
Пред една недела Гамалеја објави дека се завршени клиничките испитувања. Претходно од Русија имаше информации дека третата фаза на испитување, која би требало да покаже ефикасност на вакцината во реални животни ситуации, ќе биде одржана дури по регулаторно одобрување на вакцината.
Како влијае вакцината на човечкиот организам?
Засега од официјалните извештаи на Гамалеја е познато дека кај примањето на оваа вакцина можно е да се појави зголемена телесна температура. Гинцбург истакна дека некои испитаници во првата фаза на тестирање кренале температура до 38 степени, но со парацетамол истата се намалила.
Кога може да ја очекуваме вакцината во продажба и кој прв ќе ја прими?
Заменичката на рускиот премиер Татјана Гољикова изјави дека индустриското производство на вакцината ќе почне во септември. Рускиот министер за здравство Михаил Мурашков изјави дека здравствените работници овој месец ќе ја примат вакцината, а масовна вакцинација може да се очекува во октомври.
Шефот на Рускиот фонд за директни вложувања, Кирил Дмитриев изјави дека 20 држави ширум светот побарале повеќе од милијарда дози. Тој додаде дека Русија, заедно со странски партнери, веќе е подготвена да произведе повеќе од 500 милиони дози на вакцината во пет земји, а планот е уште повеќе да се зголемат производствените капацитети. Досега земји од Јужна Америка, Блискиот Исток и Азија покажале најголем интерес за вакцината.
Руската вакцина допрва треба да ја мине клучната трета фаза на тестирање, а Дмитриев рече дека испитувањата ќе се спроведуваат во странство.
„Веќе постигнавме договори за спроведување релевантни испитувања на вакцината со партнери од ОАЕ, Саудиска Арабија и бројни други земји“, додаде тој.
Тој коментираше и на критики насочени кон вакцината и спомена оркестрирани медиумски напади на руската вакцина, како обид за дискредитирање, пренесе CNN.