Институтот Sinopharm во Вухан вчера соопшти дека нивната вакцина е ефективна 72,51 проценти по две дози, што донекаде ги обесхрабри сите оние кои ја примиле или се пријавиле да примат вакцина против COVID-19, бидејќи процентот е под процентот на ефикасност на вакцините Sputnik V, AstraZeneca и Pfizer/BioNTech.
Од српскиот портал B92.net побараа одговори за тоа што значи ваквата ефикасност, имајќи предвид дека во Србија се дадени милион дози од оваа вакцина. Тие ја контактираа д-р Татјана Радосављевиќ, пулмолог, која самата ја прими оваа вакцина и таа вели дека немала никакви несакани ефекти од вакцината.
„Овој процент не мора да значи ништо, сè уште е кратко време за конкретна проценка, иако Кина веќе го стори тоа на голем примерок. Она што можам да го забележам кај моите пациенти и мојата околина е дека има многу добри ефекти и дека никој немал некакви штетни појави, ниту јас, а се ревакцинирав. Дури знам и девојка која се разболе од COVID-19 по вакцинирањето и помина со полесна клиничка слика, а 10 дена по таа прва доза имаше висок титар на IGG антитела“, вели д-р Радосављевиќ за B92.net.
Според неа, најголем показател за ефикасноста и безбедноста на вакцината е тоа што помина покрај српската Агенција за лекови и медицински помагала.
„Агенцијата одобри и целосно провери и колку што знам дека се користи во Кина од април минатата година и не би ја давале ако не беше одобрена претходно. Тоа што се пишува дека само што добила одобрение е политика на западните медиуми кои ги пропагираат американските и европските производители“, вели пулмологот.