Светската ракометна федерација (ИХФ) ѝ врачи специјална покана на Швајцарија за настап на Светското првенство наредната година. Швајцарците одиграа два драматични натпревари во баражот против Словенија, а на крајот Словенците се пласираа на Мундијалот.
Две селекции од регионот, Србија и Црна Гора се надеваа, но на крајот извисија за специјалната покана.
Иако претходно беше најавено дека Европската ракометна федерација (ЕХФ) во дописот доставен до ИХФ наведува дека врз основа на пласманот на Европското првенство, Црна Гора е прва на листата на замени, а по неа се Швајцарија, Србија, Грузија и Фарски Острови, сепак ИХФ донесе поинаква одлука.
За потсетување, во баражот Србија по голема борба беше поразена од големиот фаворит Шпанија, додека Црна Гора се изрезили против аутсајдерот Италија.
Покрај резултатите и квалитетот на изборот на кандидатите, ИХФ се осврна и на економскиот аспект, поточно можноста за продажба на ТВ правата, а Швајцарија кога сето тоа ќе се собере, беше најпосакувана.
Дополнително, треба да се нагласи дека ИХФ воопшто во предвид ги немала Србија и Црна Гора, туку покрај Швајцарија во игра биле Кина и Саудиска Арабија.
Од просторите на поранешна Југославија покрај Македонија пласман изборија Хрватска (како еден од домаќините) и Словенија.
