Поранешниот гувернер на Калифорнија, познатиот холивудски актер Арнолд Шварценегер, се вакцинираше во средата и упати апел граѓаните на САД да го следат неговиот пример.
Седумдесет и тригодишниот актер на социјалните мрежи објави снимка на која е забележано како прима вакцина на стадионот Доџерс во Лос Анџелес, кој во текот на пандемијата е претворен во центар за масовно вакцинирање.
„Денеска е прекрасен ден. Никогаш не сум бил посреќен додека чекам во некоја редица. Ако ги исполнувате условите, придружете ми се и пријавете се за вакцинирање. Појдете со мене ако сакате да живеете“, напиша Шварценегер во објавата на социјалните мрежи, парафразирајќи ја реченицата што ја изговара неговиот лик Терминатор во истоимениот филм.
Моментално, во Лос Анџелес вакцина примаат луѓе постари од 65 години.
