Едно од најчесто поставуваните прашања кај потенцијалните купувачи, многу често не добива едогласен одговор.
Секако, има бројни истражувања направени врз основа на искуствата на сопственци на автомобили, но голема улога играат и статистичките податоци за бројот и природата на сервисни интервенции за моделите, па некако се составува листата на модели на автомобили во кои возачите имаат најмногу доверба, односно се чувствуваат најбезбедно да тргнат со нив на пат.
На овие листи редовно високо котираат јапонските и корејските брендови, а тука некаде се и германските.
Дното на листата речиси секогаш е „резервирано“ за италијанските и британските модели.
Секако, треба да се направи разлика меѓу истражувањата за доврбата во автомобилот и од чувството на задоволност на сопственикот од возилото, како и дали се работи за нов или половен автомобил.
Што велат податоците од Consumer Reports?
Consumer Reports, претходно позната како Consumers Union, е американска непрофитна организација што се занимава со независно тестирање на производи, истражувачко новинаство, истражувања ориентирани кон потрошувачите, едуцирање на јавноста и заштита на потрошувачите.
Резултатите од годинашниот извештај за нивото на доверба во автомобилските брендови Annual Auto Reliability Survey покажуваат дека традиционално, високо се позиционираат јапонските брендови како Lexus, Mazda и Toyota.
Исто така може да се забележи дека има подобрување кај некои британски брендови, особено поради редизајнот, па така сега повисоко котираат Mini и Chrysler.
Од Consumer Reports истакнуваат дека има модели кои „стојат во место“, односно не забележале подобрување од 2018 година кога биле лансирани, како Atlas и Tiguan на Volkswagen.
Рекорден пад во една година забележа Acura – цели девет места.
Интересно е што пад забележаа и два бренда кои се германска гордост, Audi и BMW, а со подобрување не може да се пофали ни Subaru. Новите A6, X5 и Forester го соборија резултатите на овие брендови. Уште едн интересен факт е дека во групата „проблематични“ влегува и новиот BMW Series 3, како и Audi Q8.
Подобрување за Tesla
Компанијата Tesla редовно беше критикувана поради ниското рангирање во поглед на тоа дали потрошувачите имаат доверба во овој автомобилски бренд. Сите модели претходно котирале прилично ниско на листата. Сега има подобрување и стигна до класификација „препорачливи“, а тоа особено важи за Model 3 и Model S. Сепак, Tesla уште се рангира ниско – на 23-то од вкупно 30 места.
Со просечен резултат од 81 бод (од можни 100), на врвот се наоѓа Lexus. По него следат Mazda и Toyota со 77 бодови, а потоа Porsche (75) и Genesis (71), кои го заокружуваат топ 5.
На дното е еден луксузен американски бренд. Cadillac со 23 освоени бодови е полош и од Alfa Romeo (27), Acura (29), па и Volkswagen (33). Да, VW падна за девет места, а причините се поврзани со електрониката, опремата и системот за гориво.
Гледано по модели, сепак најлоши се американските - Chevrolet Colorado со 4 и Chevrolet Camaro со 5 бодови.
