„Унгарското претседателство со ЕУ ќе вложи фокусирани напори да ги започне пристапните преговори со Северна Македонија и да отвори барем едно поглавје во преговорите“, рече Сијарто. Кога станува збор за Црна Гора, Сијарто изјави дека унгарското претседателство би сакало да го олесни затворањето на „најмалку 7, но оптимално 9 или 10 поглавја“ пред крајот на годината, изјави унгарскиот министер за надворешни работи Петер Сијарто на маргините на Самитот на НАТО во Вашингтон, пренесува Танјуг.
Пристапувањето на Западен Балкан во Европската Унија ќе ја зајакне стабилноста во регионот и безбедноста на континентот, а Унгарија ќе работи на забрзување на тој процес за време на нејзиното претседавање со Унијата, изјави Сијарто.
Сијарто, за време на билатералните разговори со црногорските и македонските колеги на маргините на самитот на НАТО, рече дека стабилноста на регионот на Западен Балкан има големо влијание врз безбедноста во Европа. „Бидејќи живееме во сенка на војната во последните две и пол години, не ни треба нов конфликт или нестабилност“, рече Сијарто, соопшти унгарското Министерство за надворешни работи, пренесе агенцијата MTI.
Сијарто истакна дека последните извештаи од Косово или Босна и Херцеговина „не укажуваат на стабилност или мирен и рамномерен развој“. Зборувајќи за актуелната политика на проширување на ЕУ, Сијарто рече дека таа „го губи кредибилитетот секогаш кога некоја западноевропска или балтичка земја го попречува пристапувањето на Западен Балкан“.
