Николај Песков, син на портпаролот на Кремљ, Дмитриј Песков, изјави дека не сака да биде мобилизиран во руската војска во текот на инвазијата во Украина, со што откри дека децата на политичката елита се заштитени.
Триесет и двегодишниот Николај на телефонски повик од јутјуберот Дмитриј Низовстев, кој лажно се претстави како воен офицер, јасно до знаење даде дека ќе „повлече врски“ во Кремљ за да не биде мобилизиран.
Низовстев на Песков му објасни дека му се јавува поради мобилизацијата и дека треба да се јави на поканата, по што Песков збунето почна да објаснува зошто тој не треба да оди во војна.
Само еден повик покажа дека синовите на руската политичка елита не очекуваат повик за мобилизација за разлика од останатите стотици илјади Руси кои нема да бидат исклучок и ќе бидат испратени да гинат за идеалите на Путин.
Разговорот меѓу Песков и Низовстев е снимен во живо во емисијата Popular Politics, канал поврзан со рускиот опозиционер Алексеј Навални.
Песков во разговорот вели дека повикот за мобилизација ќе го реши на „друго ниво“, дека неговиот татко е портпарол на Путин и заменик шеф на администрацијата на Кремљ.
„Јас сум г-дин Песков, ќе го решам ова на друго ниво. Ако морам да ја бранам државата, тоа не е проблем. Но морам да ја сфатам изводливоста на моето доаѓање таму“, додаде Николај Песков и објасни дека ќе оди во војна ако Путин му се јави и го повика.
