Министерот за здравство Венко Филипче на денешната прес-конференција нагласи дека системот не потфрлил во однос на заштитата на здравјето на медицинскиот персонал. Добар дел од здравствените работници, како што потенцира, практично не се заразени за време на работа со пациенти, туку од контакти, несвесни дека имаат контакт со заболени.
– Мислам дека здравствените работници се покажаа дека се на висина на задачата како и многупати досега. Дури и над тоа ниво, со оглед на интензитетот со кој се работи, исклучително високиот степен на пожртвуваност со кој ја работат оваа работа, рече Филипче, одговарајќи на новинарско прашање.
Во врска со тоа колку тестирања се направени откако е започната кризата со пандемијата од Ковид-19 во земјава, Филипче рече дека заклучно со вчерашниот ден вкупно на Институтот за јавно здравје се направени близу 1.800, а заедно со приватните клиники близу 2.700 тестирања. Наведе дека во Иинстутот за јавно здравје дневно се прават по 200 до 300 тестирања.
– Од утре за прв пат е ставена во функција лабораторијата на Ветеринарниот институт каде што ќе се прават дополнителни 30 тестови на ден, информираше министерот.
Филипче наведе дека околу 200 пациенти се на домашно лекување, а прашан што доколку кај некој од нов дојде до влошување на состојбата, одговори дека тие се во секојдневна комуникација и со матичните лекари и со докторите во болницата.
– Пациентите кои се на домашно лекување се во секојдневна комуникација и со матичните лекари и со докторите во болницата. Значи во овој момент нема ниту еден пациент на кој клиничката слика му е со средна форма. Сите се во сосема лесна клиничка слика и можат да бидат на домашно лекување. Ние го развивме системот на транспорт и веќе од почетокот на следнава недела ќе бидат транспортирани до болница пациентите кај кои ќе биде индицирано примањето на терапија со цел тие да ја примаат во болнички услови, рече Филипче.
На новинарско прашање, кај колку пациенти е започната терапија со „Сумамед“ и лекот против маларија и дали има позитивни реакции на таа терапија, министерот наведе дека се уште е рано да се кажат резултатите од терапијата.
– Кај сите кај кои што е индицирана, согласно проверките на функцијата на срцето, веќе е дадена на Клиниката, а веќе од неделава и кај сите што се на домашно лекување. Во однос на успешноста, мислам дека е рано да се каже. Треба да поминат уште неколку денови. Првите резултати се очекуваат по 5-7 дена од почетокот на терапијата, појасни министерот Филипче.
Информира дека вчера дијагостицираниот пациент во „8 Септември“ е префрлен на Клиниката за инфективни болести и додаде дека уште има слободни капацитети, повеќе од половина од креветите во Клиниката за инфективни болести се слободни. Од утре најави дека почнува со организација и Клиниката за кожни болести.
-Почитувани граѓани сакам да кажам дека пандемијата во светот не стивнува, напротив бројката постојано расте, вирусот не заобиколи ниту една земја, не ја заобиколи ниту нашата. Нешто повеќе од еден месец кога првпат беше регистриран првиот позитивен случај во нашата земја и од тогаш до денес бројката на потврдени слуачи секојдневно расте. Добро е што бројот на случаи се зголемува линеарно, а не експоненцијално, што значи дека секој ден имаме приближно еднакво зголемување, што се уште му дава шанса на нашиот систем за одржливост и можност соодветно ги прими и амортизира сите пациенти без притоа да бидат пренатрупани нашите капацитети, додаде Филипче и нагласи дека сепак се уште сме во една форма на војна против Ковид-19.
Нагласи дека пред нас е најтешкиот период во кој се очекува бројот на заболени да расте.
-Ни претстои за жал и период во кој ќе расте и бројот на починати. За ова сите мораме да бидеме свесни. Денеска имаме и еден млад човек кој што почина. Ова е доказ дека вирусот не штеди никој, никој не е имун, ниту заштитен од него. Стануваше збор за најтешката можна форма на клиничка манифестација на оваа болест, рече министерот за здравство и упати апел до сите граѓани да ги почитуваат препораките.
