Подготовките на „Граѓаните“ за новата сезона се прекинати откако двајца клучни играчи поради позитивен тест мораа да заминат во карантин.
Двоецот на Манчестер Сити, Ријад Махрез и Емерик Лапорт, се позитивни на COVID-19, откри скринингот.
Клубот соопшти дека двајцата играчи се ставени во самоизолација каде ќе седат во наредните две недели.
„Манчестер Сити потврдува дека Ријад Махрез и Емерик Лапорт на тестирањата излегоа позитивни на COVID-19. Двајцата играчи веќе се ставени во самоизолација во согласност во протоколот за карантин издаден од Премиер лигата и Владата на Обединетото Кралство. Сите во клубот им посакуваат брзо оздравување на Ријад и на Емерик и враќање за тренинзите“, стои во клупската објава.
Порталот Goal пренесува и дека во карантин се наоѓа и тренерот Пеп Гуардиола кој бил во Шпанија и поради патувањето во ризична земја, според владиниот протокол, мора да остане две недели во самоизолација.
Манчестер Сити новата сезона ја започнува на 21 септември со гостувањето кај Вулверхемптон.
