По контроверзиите што избувнаа викендов околу наводна онлајн преписка, актерот Арми Хамер се повлече од филмот „Shotgun Wedding“.
Пораките кои му се припишуваат на актерот говорат за нагони за силување, канибализам и други вулгарности. Хамер стана главна тема на Twitter по серијата објавени експлицитни пораки на Instagram, кои наводно ги испратил на некоја жена, а се објавени анонимно од сега веќе приватниот профил House of Effie.
Тој порекнува каква било поврзаност со преписката.
„Не одговарам на овие глупости, но во насока на тие злобни и лажливи интернет-напади против мене, не можам сега со чиста совест да си ги оставам децата на четири месеци заради снимање филм во Доминиканска Република. Од Lionsgate ме поддржуваат во ова и јас сум им благодарен“, изјави тој за Variety.
Наводите ги потврдија и од продукциската компанија одговорна за филмот.
„Како што наближуваше датумот за почеток на снимањето на Shotgun Wedding, Арми побара да се тргне од филмот и ние го поддржуваме во неговата одлука“, соопштија од Lionsgate.
Љубовната комедија „Shotgun Wedding“ е во претпродукција. Ќе биде режирана од Џесон Мур, сценариото е на Марк Хамер и Елизабет Мериведер, а главната женска улога ѝ припадна на Џенифер Лопез.
Најнов филм на Хамер е „Rebecca“ на Netflix, а се очекува да ја репризира улогата во продолжението на „Call Me by Your Name“ со Тимоти Шаламе и да игра една од главните улоги во серијата „The Offer“ на Paramount Plus TV, приказна за случувањата зад камерата за време на снимањето на култниот „The Godfather“.