Глобалните цени на златото бележат раст бидејќи меѓународните трговски тензии, бранот девалвации на валутите во годинава што изминува и забавениот економски раст на стопанствата во подем ја поттикнаа побарувачката на инвеститорите за „безбеден избор“.
Зголемената побарувачка на злато делумно се должи и на падот на акциите на глобално ниво, што во голема мера се должи на зголемените политички ризици.
Според Bloomberg News, резервите на ETF се зголемиле на над 2.180 тони на 25 декември, во споредба со 2.080 тони во октомври. ETF моментално има најголеми резерви на злато од почетокот на јули.
Златото утринава се тргуваше за 1.271,85 долари за унца, што е највисока вредност од јуни годинава.
Експертите велат дека побарувачката на злато е најголема од јануари, 2017 и дека тоа најмногу се должи на пролонгираните закани од економско забавување и политичка несигурност кај развиените стопанства.
„Овие тенденции треба да им послужат како потсетик на инвеститорите дека златото во секаква форма треба да биде основен дел на секоја долгорочна стратегија за инвестиција. Златото уште еднаш ја докажа својата вистинска тежина во време кога состојбата на берзите станува турбулентна“, вели Стивен Инс од инвестициската компанија Oanda.
Други пак сметаат дека овој тренд е сезонски.
„Секогаш има добра побарувачка на крајот на годината. Не би требало да бидеме изненадени и ако цената на златото надмине вредност од 1.300 долари за унца во блиска иднина“, вели Јуичи Икемизу од токиската банка ICBC Standard Bank.
