Комисијата за заразни болести препорачува изолацијата на лица позитивни од COVID-19 од 10 дена да се намали на 7 дена, изјави денеска министерот за здравство Беким Сали.
– На денешната седница која беше свикана по барање на министерот за здравство, членовите на Комисијата одговорија позитивно и се состанавме. На тој состанок се разговараше, и секако врз основа на следењето на трендот на одлуки кои се донесени во различни држави, кои се релевантни и се земаат за пример за споредување, и врз основа на нашиот Институт за јавно здравје кој ги добива на дневна база податоците, одлуката на Комисијата е изолацијата од 10 дена да се намали на 7 дена, изјави Сали за ТВ Сител.
Тој напомена дека оваа одлука не е конечна, затоа што, како што рече, во идниот период состојбата со новозарезани ќе се следи и соодветно ќе се носат препораки и одлуки.
Оваа препорака на Комисијата треба да се најде на Кризен штаб в понеделник, а во вторник веќе треба да биде на седницата на Влада.
