Норвешкиот фудбалер Ерлинг Браут Холанд ги коментираше гласините дека можно е да ја напушти Борусија Дортмунд во еден од најголемите трансфери на сите времиња.
Холанд моментално се подготвува за новата сезона во дресот на Дортмунд, а откако го одработи тренингот даваше изјави за присутните медиуми.
Секако, главната тема беше можниот трансфер. Новинарите прашуваа дали има вистина во тоа што некои клубови се подготвени да издвојат дури 175 милиони евра за неговите услуги.
Норвежанецот понуди интересен одговор.
„Не сум разговарал со менаџерот од неделата и имам слушнато гласини во медиумите. Сепак, се надевам дека се само гласини, затоа што 175 милиони се премногу за еден човек“, изјави Холанд за медиумите.
Норвешкиот напаѓач е посветен на Дортмунд и размислува само за тоа како може да ја подобри својата игра.
„Како прво, имам уште три години од договорот со Дортмунд и уживам тука. Но, се разбира, победите се најважни и тоа е она што го сакам“, додаде тој.
Да потсетиме, најголем интерес за напаѓачот покажа актуелниот европски шампион Челси, а беа споменати и Манчестер Јунајтед и Реал Мадрид.
