Моден викенд Скопје по 16-ти пат ги собра на едно место љубителите на модата, како единствена платформа за презентација на младите дизајнери кои се стремат да станат следните познати имиња на македонската модна сцена, но и место каде од сезона во сезона пред публиката се докажуваат веќе етаблираните дизајнери.
„Скопје Мериот Хотел“ е епицентарот на модните случувања оваа сезона, што се одржува под мотото #Stopthetraffik и отвора подлабока дискусија за модната индустрија зад нејзиното сјајно и гламурозно лице.
Сезоната ја отвори ревијата на „Papaz“ за колекцијата „Подем на гревот“, смела, сензуална и сексапилна модна приказна на дизајнерот Андреј Папаз Ѓорѓиевски.
Впечатливите женствени силуети инспирирани од приказната за Содома и Гомора, синоним за гревот и хедонизмот, беа вешто сплотени со традиционалните елементи на Блискиот Исток, создавајќи еден дуален, но крајно провокативен сублимат.
Контрастот не заврши тука: комбинирајќи ги строгоста на чојата, еко кожата и штофот со лелеавоста на свилениот жоржет, Папаз совршено ги доловува двата дијаметрално спротивни елементи на жената: нејзината отпорност и сензуалност.
Со исклучок на неколку пропусти во поглед на фитингот, Папаз го потврди неговиот впечатлив дизајнерски израз во кој уште се чувствува силно влијание на неговите костимографски корени.
По презентацијата на најновата колекција на „Sigma Jewelry“, следеше ревијата за колекцијата „Маршот на боговите“ на младата дизајнерка Викторија Арсовска.
Дизајнерката вели дека женственоста и сексапилот ги претставува преку кроеви инспирирани од машки униформи и преку машката грубост на посебно избрани материјали. Арсовска претстави корсети подзатскриени со капути и елеци од чоја и кожа, свилени фустани во комбинација со кожни ремени и метални копчиња.
Иако на моменти нејзината модна приказна делуваше недовршено, Арсовска ја заинтригира публиката со нејзините смели,контрастни силуети.
Со колекцијата „Art deco“ на „Ателје Коцарева“ заврши првата модна вечер.
„Колекцијата 'Art deco' е женствена, деликатна и раскошна затоа што раскажува приказна за токму таква, безвременска жена изразена преку софистицирана, гламурозна а смела визија.
Секое парче е индивидуализирано, изработено од уникатни материјали (природни пердуви, рачни везови) и на посебен начин го осликува совршениот стил на 20-тите години.“, вели Моника Коцарева.
Дизајнерката ги испрати моделите на писта со сјајни црни боб перики и порцелански мејкап, па наликуваа на кукли од излог што оживеаја на пистата. Иако впечатлив на писта, ваквиот стилистички потег на Коцарева делумно го згаснува сјајот на софистицираната, гламурозна жена што имала намера да ја претстави дизајнерката.
Шеснаесеттото издание на Моден викенд Скопје продолжува вечерва на истата локација, со ревиите на студентите од Институтот за дизајн и инженеринг на ТМФ под водство на дизајнерката Лидија Ѓеоргиева, а потоа следат „Minna Fashion“ од Косово, новите колекции на Сара Реџиќ и Марија Трајанова, а за крај „Drama Studio“ на Ивана Кнез.
Фото: Ани и Дими
