Додека ракети паѓаат врз главниот град на Нагорно-Карабах, лидерите на двете завојувани страни изјавуваат дека се подготвени да го прекинат конфликтот.
Синоќа во Степанакерт, главниот град на Нагорно-Карабах, се слушнаа околу 30 ракети, а ерменските власти ја обвинуваат азербејџанската армија за нападот. Нападите делумно ја оштетија инфраструктурата, така што делови од градот немаа електрична енергија. Во градот постојано се слушаат сирени за предупредување, пренесува ТАСС.
Ерменскиот премиер Никол Пашинјан изјави дека армијата на непризнатата република Арцах ја намамила азербејџанската армија во стапица во насока на Џебраил и им нанела разорни удари.
„Идејата на командантите од Карабах успеа - тие направија тактички чекори на југ, го напуштија коридорот и ги намамија војниците на Азербејџан таму. Буквално во овој момент, тој корпус прима уништувачки удари“, рече тој.
Информациите што ги даваат Ереван и Баку се суштински различни.
Истиот ден, Алијев објави дека азербејџанските вооружени сили претходно окупирале три села и преку стратешките висорамнини во конфликтната зона. Азербејџанскиот претседател истакна дека неговите војници напредувале во правец на Џебраил, додека армиите на Ерменија и Карабах ја напуштале опремата и бегале.
Ерменскиот претседател Армен Саркисјан го разреши шефот на Службата за национална безбедност, Аргишти Кјарамјан, објави прес-службата на ерменскиот лидер. Причината за разрешувањето на Кјарамјан не беше наведена.
Во Нагорно-Карабах, бројот на убиени борци достигна 350, објави армијата на самопрогласената држава Арцах, а пренесува ANSA.
Министерството за одбрана на Арцах соопшти дека уште 30 борци биле убиени во директни судири со азербејџанската армија во конфликтната зона во Нагорно-Карабах. Според извештаите на Министерството, од почетокот на избувнувањето на воените дејствија, на 27 септември, дури 350 војници биле убиени во „одбранбени акции“ во Карабах, пренесе Intefax.
Министерството за одбрана на Ерменија објави дека се урнати две азербејџански беспилотни летала во Нагорно-Карабах.
„Две непријателски беспилотни летала беа уништени во јужниот дел на фронтот“, напиша портпаролката на ерменското Министерство за одбрана Шушан Степанјан на Facebook, пренесува RIA Novosti.