Никој не знае со сигурност што се крие во вселената, а нашата галаксија Млечен Пат е полна со мистериозни магнетни нишки на новата телескопоска снимка што ја направи Јужноафриканската радиоастрономска опсерваторија MeerKAT.
Нишките се протегаат близу 150 светлосни години во должина и се рамномерно распоредени, а бизарните структури се стари неколку милиони години и се разликуваат по изглед, пишува CNN. Некои личат на жици од харфа, водопади, па дури и наликуваат на прстените околу Сатурн.
Фархад Јусеф-Задех, професор по физика и астрономија на Универзитетот Нортвестерн, првпат ги откри нишките пред 35 години преку радиобранови. Тој откри дека нишките се направени од електрони од космички зраци кои ги придвижуваат нивните магнетни полиња со брзина блиска до брзината на светлината. Сепак, потеклото на нишките остана мистерија.
Сега астрономите открија 10 пати повеќе нишки од претходното откритие, а истражувањето е опишано во The Astrophysical Journal Letters.
„Долго проучувавме поединечни нишки со кратковидно гледање“, рече Јусеф-Задех, главен автор на студијата и член на Центарот за интердисциплинарни и астрофизички истражувања при Нортвестерн.
„Сега конечно ја гледаме големата слика - панорамски поглед исполнет со изобилство на нишки. Само испитувањето на неколку нишки го отежнува извлекувањето на вистински заклучоци за тоа што се и од каде доаѓаат. Ова е пресвртна точка во нашето понатамошно разбирање на овие структури“, додаде тој.
Новата, детална снимка е всушност составена од мозаик од 20 различни набљудувања направени во текот на три години, гледајќи кон далечниот центар на Млечниот Пат, кој се наоѓа на 25.000 светлосни години од Земјата.
Количината на зрачење варира од другите енергетски космички настани, како што се остатоците од супернова, покажа анализата на нишките. Научниците веруваат дека нишките се поверојатно поврзани со мината активност предизвикана од супермасивна црна дупка во центарот на Млечниот Пат, наместо со експлозии на ѕвезди. Тимот исто така откри дека магнетните полиња се посилни долж филаментите.
„Ако, на пример, сте од друга планета и сретнете многу висока личност на Земјата, би можеле да претпоставите дека сите луѓе се високи. Но, ако направите статистика за популацијата на луѓе, ќе стигнете до просечната висина. Токму тоа го правиме. Можеме да ја пронајдеме јачината на магнетните полиња, нивните должини, нивната ориентација и спектарот на зрачење“, рече Јусеф-Задех.
