Поранешниот аналитичар на американската Агенција за национална безбедност (НСА) Едвард Сноуден доби руски пасош и положи заклетва за државјанство, изјави денес неговиот адвокат Анатолиј Кучерена.
– Да, тој доби пасош и положи заклетва, потврди Кучерена на прашањето на руските медиуми дали Сноуден добил руски пасош.
Сопругата на Сноуден, Линдзи Милс, моментално ги доставува потребните документи за да добие руско државјанство, пренесе The Moscow Times.
Сноуден дојде во Русија на 23 јуни 2013 година, откако на почетокот на тој месец обелодени таен судски налог со кој на американските специјални служби им се дава пристап до сите повици што ги упатува американскиот мобилен оператор Верајзон.
Тој објави и податоци за супертајната програма на неговиот поранешен работодавач, НСА „Призма“, која овозможи следење на електронските комуникации на многу интернет страници.