Македонската фудбалска репрезентација ќе добие засилување во средниот ред откако ФИФА даде зелено светко поранешниот младински репрезентативец на Шведска да направи промена на спортскиот пасош.
Ердал Ракип има 25 години и игра на средината од теренот. По потекло е од Преспа, но е роден во Малме, Шведска каде неговите родители се иселени. Играше за сите младински репрезентации на Шведска, а со У17 репрезентацијата освои бронза на Мундијалот во 2013 година. Но, никогаш не успеа да стане сениорски репрезенттаивец.
Тој од порано ѝ е познат на ФФМ, но до неодамна немаше желба да настапува за Македонија, надевајќи се дека со добрите игри за Малме ќе се наметне во шведската репрезентација, што никогаш не се случи. На „Црвено-жолтите“ почна да им се додворува после пласманот на ЕУРО 2020, но тогашниот селектор Игор Ангеловски јасно стави до знаење дека нема намера на историскиот деби настап на континенталниот собир да носи фудбалер кој претходно не сакал да игра за Македонија.
Македонската репрезентација сега игра нов циклус квалификации, а новиот селектор Благоја Милевски оствари контакт со Ракип, играчот одлучи да настапува за Македонија во иднина, целосната документација за промена на спортски пасош беше предадена кај ФИФА, а сега стигна и посакуваното зелено светло.
Ракип, кој сезонава со Малме настапува во Лигата на шампионте, ќе ја засили конкуренцијата во средниот ред каде се очекува да го видиме веќе за октомвриските натпревари против Лихтренштајн и Германија. Познато е дека Енис Барди сѐ уште е повреден и прашање е дали ќе се опорави навреме, додека Аријан Адеми ќе се врати во составот, но тој е често склон кон повреди и затоа додавањето на Ракип е одлично освежување и збогатување на опциите во средината.
Со Малме досега има 5 титули шампион на Шведска, како и 1 титула во шведскиот Суперкуп. Со оглед на неговото етничко турско потекло, можеше да настапува и за репрезентацијата на Турција.
