Новиот сој омикрон делумно ја избегнува заштитата која ја нуди вакцината Pfizer, но луѓето коишто претходно биле заразени, а потоа вакцинирани, најверојатно ќе бидат заштитени, изјавија истражувачите кои работат во Јужна Африка.
Бустер дозите веројатно ќе дадат ефект, рече за CNN Алекс Сигал од Институтот за здравје на Африка кој го предводеше истражувачкиот тим.
Тестовите во лабораториите, за кои биле користени примероци од 12 лица кои се вакцинирани со Pfizer, покажаа дека сојот омикрон може да ја избегне имунолошката заштита која ја создава вакцината, но не во целост.
Тоа е првиот експеримент со кој директно се гледа како вирусот омикрон може да се однесува кај вакцинираните луѓе.
Јужноафриканските истражувачи откриваат докази дека луѓето полесно се реинфицирале со варијантата омикрон отколку со други варијанти.
Сепак, директорот за итни случаи на СЗО, Мајк Рајан, истакна дека нема знаци дека омикрон би бил повеќе отпорен во избегнувањето на вакцините од другите варијанти.
„Имаме многу добри вакцини кои досега се покажаа ефикасни против сите варијанти, во смисла на сериозни болести и хоспитализација, и нема причина да се очекува дека тоа нема да биде случај овој пат“, изјави Рајан.