Скопје, 26 мај 2020 (МИА) – Датумот на изборите е детерминиран со уредбата со законска сила која има важење до завршување на вонредната состојба. Во оној момент кога ќе заврши вонредната состојба за 22 дена треба да се одржат избори и тоа е фактичка состојба. Затоа треба да се реализираат изборите во првиот можен рок. Мораме да бидеме принципиелни, а изборите да бидат во оној момент кога ќе има најмногу создадени услови, порача денеска премиерот Оливер Спасовски.
Тој истакна дека на македонската демократија и на македонскиот развој им требаат стабилни институции и колку што е можно побрзо враќање на нормалниот колосек на функционирање на државата, а на македонските граѓани им треба функционално Собрание.
Една од одговорностите на Владата, потенцираше, е да направи се колку што е можно побргу да им ја обезбеди новата нормалност на сите граѓани
-Сите што се спротивставуваат на новата нормалност придонесуваат земјата да ни остане во здравствено економската криза, а тоа не е одговорно однесување, посочи Спасовски на прес-конференцијата на која беше објавено прекин на полицискиот час и олабавување на рестриктивните мерки.
