Секоја година меѓу 17 јули и 24 август на небото се случува вистински спектакл – метеорскиот дожд Персеиди. Кулминацијата на оваа небесна појава е вечерва и утревечер.
Неколку илјади тони различни честички и прашина влетуваат во нашата атмосфера секоја година, а огромна количина од овие честички согорува во атмосферата и не стигнува до површината на Земјата. Но, некои од нив „преживуваат“ и паѓаат на површината и тогаш се нарекуваат метеорити.
Брзината со која честичките влетуваат во атмосферата на нашата планета се движи во интервал од 30 до 70 км/ч, а светлосната појава метеор настанува на височина од 80 до 120 километри.
Во изминативе години, за време на максималната активност на Персеидите можеше да се забележат и по 80 до 100 метеори во еден час.
Персеидите се најверојатно најпознатите и најубавите метеорски дождови.
Сајтот astronomija.mk на Скопското астрономско друштво пишува дека Персеидите можат да произведат еден до два метеора во минута за одреден набљудувач под темно, рурално небо. Било какво светлосно загадување или месечева светлина значително го намалува бројот на видливи објекти. За небесната претстава во 2020, бидејќи Месечината во последна четвртина изгрева околу 11 часот, најдобро е да се бараат метеори веднаш по стемнување и пред изгревот на месечината.
Метеорите изгледаат како да излегуваат од соѕвездието Персеј, по кое е наречен дождот, кое ова време во годината изгрева по полноќ на североисточното небо низ целата северна полутопка. Но се препорачува да се гледа кон североисток од почетокот на ноќта за да се фатат дури и заостанатите ѕвезди што паѓаат.
Не се потребни телескопи и двогледи – голото око е најдобро приспособено бидејќи може да го опфати целото небо, а метеорите можат да се појават секаде на небото, објави astronomija.mk.