АЕК ја освои титулата во Грција, а најмногу се израдува Шахтар

Шахтар синоќа ја освои титулата во украинскиот шампионат, а некаде по 20 часот ја доби најдобрата можна вест од Грција бидејќи таму атински АЕК ја освои титулата, а тоа за Украинците значи дека како шампиони со најдобар клупски коефициент добија директно место во Лигата на шампионите.

Бидејќи двата потенцијални освојувачи на титулата во Лигата на шампионите, Арсенал и Пари Сен-Жермен, се квалификуваа за лигашката фаза преку нивната позиција во домашното првенство, списокот за пристап е ребалансиран. Највисоко рангираниот шампион во квалификациските рунди, Шахтар од Донецк, е преместен од второто квалификациско коло во лигашката фаза, додека двата највисоко рангирани шампиони кои првично влегоа во првото квалификациско коло се преместуваат во второто квалификациско коло.

Украинските шампиони, предводени од турскиот тренер Арда Туран, ја завршија сезоната на најдобар можен начин. Тие официјално станаа 18-тиот тим што обезбеди директен пласман во елитното натпреварување, по Барселона, Баерн, ПСВ, Арсенал, Реал Мадрид, Интер, Манчестер Сити, ПСЖ, Борусија Дортмунд, Виљареал, Порто, Манчестер Јунајтед, Атлетико, Ланс, Лајпциг, Галатасарај и Фејнорд.

Долго време кандидат за тоа директно место беше белградска Црвена звезда, во еден момент дури и водечки кандидат бидејќи Шахтар беше втор во Украина зад изненадувањето Черкаси. Но, малиот клуб загуби здив, додека четата на Арда Туран неуморно иташе кон титулата. Така, поранешниот европски шампион ќе мора да игра квалификации почнувајќи од второто коло.

А, што се однесува на грчкиот шампион, тој ќе стартува од плејоф квалификациската рунда, каде засега место има обезбедено само уште норвешки Викинг. Ова е последното коло пред лигашката фаза.

За македонскиот шампион овие претумбации на значат ништо, без разлика дали титулата ќе ја освои Вардар или Шкендија. Кој и да биде ќе почне од првото квалификациско коло.