Англија и Велс играат добротворен натпревар за борба против деменцијата

Репрезентациите на Англија и Велс ќе се сретнат вечерва (20:45 часот) на познатиот „Вембли“ во пријателски натпревар кој носи силна порака - поддршка за луѓето што живеат со деменција.

Иако се жестоки ривали на теренот, овој пат Англичаните и Велшаните ги здружија силите во благородна мисија. Иницијативата ја предводи Фудбалската асоцијација (ФА), во соработка со организацијата за Алцхајмерова болест, а со цел да се привлече вниманието на јавноста кон предизвиците со кои се соочуваат оние што страдаат од оваа болест.

Во симболичен гест, наместо вообичаените деца што излегуваат на теренот, играчите ќе вода 22 навивачи од Англија и Велс кои живеат со деменција. Тие беа избрани од кандидати од двете земји, а нивното присуство на теренот треба да испрати јасна порака - борбата против деменцијата е можна само со меѓусебна поддршка.

Во второто полувреме репрезентациите ќе играат во дресови без имиња - моќна визуелна претстава на еден од најчестите симптоми на деменција: губење на меморијата. Сличен потег беше забележан во март 2024 година кога Англија играше против Белгија, во рамки на истата кампања.

По овој посебен натпревар, двата тима го продолжуваат натпреварувањето во квалификациите за Мундијалот 2026. Англија ќе игра на гости против Латвија на 14 октомври, додека Велс ќе биде домаќин на Белгија во Кардиф еден ден претходно - во натпревар што може да биде клучен за нивниот пласман на Светското првенство.

Велс моментално го зазема третото место во групата во која е и Македонија, а триумф над Белгијците значително би им ги зголемил шансите за пласман на завршниот турнир пред одлучувачкиот дуел со Македонците со ноември.