Второлигашот од Струмица најави вечерен термин за своите домашнни натпревари за вистинско уживање на струмичките љубители на фудбалот.
Беласица во саботата новата сезона ја отвори со реми 1:1 на гости кај Охрид Лихнидос иако водеше од 6. минута па с до петнаесетина минути пред крајот. Во наредното коло ќе му биде домаќин на Скопје, а управата на клубот не чекаше мнногу за да соопшти дека токму од тој натпревар почнува играњето во вечерен термин.
Имено, мечот Беласица - Скопје ќе се одигра в недела (31 август) со почеток во 19:30 часот на стадионот „Благој Истатов“. Цената на билетите ќе биде симболични 100 денари.
„Сите други домашни натпревари сѐ додека налагаат временските услови ќе бидат одиграни во вечерни термини под рефлектори“, соопшти Беласица.
Струмичкиот клуб сезонава најави борба за врвот и пласман во првата лига.
„Ги каниме сите љубители на фудбалот од Струмица и околината во недела да дојдат и да го поддржат нашиот тим и да уживаат во вечерната атмосфера која многу малку клубови од Македонија можат да си ја препуштат и е реткост во нашиот фудбал“, стои во официјалната објава.
Беласица в среда игра дома и во Купот на Македонија, против прволигашот Арсими, но тој натпревар ќе се игра од 16 часот.
