Бостон остана без пиво откако во градот пристигнаа голем број навивачи на шкотската фудбалска репрезентација која игра два натпревари од групната фаза на Светското првенство во американскиот град.
Како што сопствениците на пабови во Бостон открија за NBC News, доаѓањето на Шкотланѓаните во градот доведе до недостиг од пиво и ги принуди да прават непланирани купувања.
Сепак, дури и таму се појави проблем, бидејќи добавувачите не беа подготвени за такво сценарио.
Шкотските навивачи, попознати како Тартанската армија, особено го претпочитаат „своето“ пиво Тенентс Лагер, па затоа некои пабови беа подобро подготвени и нарачаа поголеми количини.
Сепак, повеќето пабови останаа „покуси“, па дури и добавувачите останаа без овој вид пиво. Нови испораки се очекуваат во наредните денови, за време на кои навивачите на Шкотска ќе се преселат во Мајами, каде што нивниот тим ќе го игра својот втор натпревар од групата.
Проблемите со достапноста на пиво за Шкотланѓаните започнаа уште во авионите за САД. Некои навивачи се пожалија дека немале доволно пиво на летовите што ги однеле во Бостон.
Иако го „исушија“ Бостон, навивачите одлично се забавуваат во овој град. Тие во голем број отидоа на натпревар на бејзбол тимот Бостон Ред Сокс, каде што целосно го привлекоа вниманието на публиката, пеејќи навивачки песни.
Шкотска го одигра својот прв натпревар во Бостон, каде што го победи Хаити со резултат од 1:0, а по дуелот со Бразил во Мајами, се враќаат во Бостон каде што ќе ги завршат своите натпревари од групната фаза, со дуел против Мароко.
