Манчестер Сити ќе ја заврши сезоната без трофеј, но исто така ќе остане и без капитенот Кевин Де Брујне, кој сè уште не знае каде ќе ја продолжи кариерата.

Веќе е познато дека белгискиот фудбалер ќе го напушти Сити и ќе започне ново поглавје во својата кариера, но сè уште не е познато каде ќе биде тоа. Чикаго Фајр и Наполи покажуваат интерес, меѓутоа, постои интерес и од клубови од Англија.
Де Брујне, зборуваше на оваа тема по поразот во финалето на ФА купот против Кристал Палас (1:0).
„Дали ќе останам во Англија? Зависи од тоа кој би дошол со понуда… Имам семејство, деца, морам да донесам одлука што ќе им одговара на сите. Одлуката е комплексна“, рече Белгиецот.
Постои интерес од северно-американската МЛС, а Де Брујне вели дека сè уште сака да игра фудбал на највисоко ниво.
„Разговарам со други клубови, да. Сакам да играм добар фудбал, каква и да е одлуката“.
Де Брујне го напушта Сити по 10 години поминати на стадионот „Итихад“.