Голманот на Манчестер Сити и капитен на италијанската репрезентација, Џанлуиџи Донарума, проговори за прв пат по неговата кошмарна ноќ во Зеница и поразот од Босна и Херцеговина во баражот за пласман на Светското првенство 2026.
Донарума доби критики и исвиркувања од публиката на стадионот „Билино Поље“ поради неговото грубо однесување во текот на целиот натпревар. Покрај губењето време, кое не е толку неочекувано и шокантно, голманот беше првиот што се впушташе во секоја тепачка, напаѓајќи ги играчите на БиХ, а во еден момент и физички го нападна Амар Дедиќ.
Голманот на Сити беше капитен на Италија во дуелите против Северна Ирска и БиХ, а по една недела молчење, реши да проговори за сè и да истакне што најмногу го боли.
Донарума вели дека никој во италијанската репрезентација не побарал бонуси за пласман на Светското првенство. Италијанските медиуми објавија дека пред почетокот на финалниот бараж во Зеница италијанските играчи побарале бонус од 10.000 евра за победа над БиХ.
„Најмногу ме повредја лагите што излегоа на виделина. Како капитен, никогаш не сум побарал од репрезентацијата ниту едно евро. Она што се случува во репрезентацијата, како и во секое натпреварување, е дека на играчите им се дава бонус ако ја исполнат целта. Тоа е сè што се случи и никој не побара ништо од федерацијата“, изјави Донарума за Sky Sports и продолжи:
„Нашиот подарок ќе беше да се квалификуваме за Светското првенство. За жал, тоа не се случи. Повеќе ме повредија коментарите и зборовите што беа кажани отколку сè друго“, додава капитенот на Италија.
Донарума беше погоден од фактот дека повеќе нема да работи со Џенаро Гатузо, Габриеле Гравина и Џанлуиџи Буфон, кои поднесоа оставки од националниот тим и федерацијата по дебаклот во Зеница.
„Имав прекрасен однос со Џиџи, Гатузо и Гравина. Пред сѐ, на сите ни е жал за нив, природно е да се чувствувате донекаде одговорни за сè што се случува сега и тоа боли. Но, сакам да им се заблагодарам на селекторот, претседателот и Џиџи, бидејќи дадоа важен придонес“, додава Донарума.
Конечно, капитенот на Италија вели дека сите мора да се свртат кон подобра иднина и да заборават што се случило.
„Тешко е, но мора да продолжиме напред со сила и со свест дека Италија ќе се врати силна, дека ќе се врати сјајна. Првите два дена беа многу тешки и заморни. Боли, навистина боли. Во првите денови се мачев да го прифатам тоа. Но, вистината е дека мора да се почне одново, да се продолжи напред, да се реагира“, заклучи голманот на Манчестер Сити.
