Динамо од Дрезден одлучи да воведе нови правила на својот стадион, што особено ќе влијаат на инфлуенсерите, јутјуберите, стримерите и другите креатори на содржини. Германскиот клуб ги промени правилата за користење на стадионот „Рудолф Харбиг“ и јасно дефинираше што им е дозволено на посетителите да снимаат без претходна дозвола.
Ова не е забрана за користење телефони, ниту пак навивачите ќе бидат спречени да фотографираат и снимаат натпревари за приватни цели. Проблемот се јавува кога содржината ќе стане комерцијална по природа.
Динамо претходно имаше правило со кое се ограничуваше комерцијалното фотографирање и снимање без дозвола, но сега отиде чекор понатаму. Според новите прописи, секоја содржина што по својата природа и опсег може да се смета за маркетинг на инфлуенсери или е наменета за монетизација бара претходна согласност од клубот.
Регулативата се однесува и на употребата на професионална опрема за производство на таква содржина.
Ова значи дека обичниот навивач сè уште може да направи фотографија или видео со својот телефон и да го објави за приватни цели без никакви проблеми. Од друга страна, инфлуенсерите, влогерите и стримерите кои го користат своето присуство на натпреварот за да креираат содржина од која заработуваат пари, прво ќе мора да добијат зелено светло од Динамо.
Динамо е форминан во 1953 година како клуб на источногерманската полиција. Стана најпопуларен и најуспешен клуб во Источна Германија освојувајќи 8 шампионски титули. По обединувањето играше 4 сезони во Бундеслигата, но како и останатите клубови од источниот дел финансиски падна и играше во четврта, трета и втора лига. Минатата сезона се врати во 2. Бундеслига и заврши 11-ти.
Дрезден е главен град на сојузната држава Саксонија и втор најголем во неа по Лајпциг. Се наоѓа во поранешната Источна Германија и е познат по навивачите кои се екстремни националисти, како и поголемиот дел од навивачките групи во поранешната комунистичка држава. За разлика од другите делови на денешна обединета Германија, во тој источен дел имиграцијата е сѐ уште на многу ниско ниво токму поради нетрпеливоста на локалното население кон новодојдените, освен во престолнината Берлин. Во изминатите децении бројните напади врз имигранти ја направија поранешна Истиочна Германија непосакувана средина.
