Дисциплинската комисија при ФФМ денеска ги донесе одлуките за казните од финалето на Купот на Македонија. Силекс го освои пехарот со победа од 1:0, но финалето мина во сенка на дивеењето на навивачите на тетовскиот клуб, а капак беше непојавувањето на тетовчани на церемонијата за доделувањето на медалите.
Дисциплинската комисија при ФФМ донесе одлука со која Шкендија се казнува со парична казна во висина од 15.000 евра поради користење на пиротехнички средства на финалниот натпревар од Купот на Македонија помеѓу Силекс и Шкендија од страна на навивачката група Балисти. Дополнително го казни клубот со 10.000 евра поради националистички скандирања и слогани со навредлива содржина на национална основа, како и со 20.000 евра поради истакнување транспарент со нацистичка содржина, за што веќе беа казнети од УЕФА.
Шкендија е казнета и со 30.000 евра и исклучување од натпреварувањето во Купот на Македонија за сезоната 2026/2027 поради одбивање да ги прими медалите на свечената церемонија, како и поради деградирачки и непочитувачки однос кон официјалните лица и противничката екипа.
Покрај тоа, на Шкендија ѝ е изречена казна од 30.000 евра и забрана за присуство на публика на следните 4 домашни натпревари поради непочитување на националната химна, односно исвиркување и дискриминаторски однос за време на финалниот натпревар од Купот на Македонија.
Вкупната парична казна за Шкендија изнесува 105 илјади евра!
Другиот финалист, Силекс од Кратово, е казнет со парична казна во висина од 5.000 евра поради користење на пиротехнички средства од страна на навививачката група Кратери на финалниот натпревар од Купот на Македонија.
Дисциплинската комисија при ФФМ се изјасни и за недоличното славје на навивачите и фудбалерите на Вардар за освојувањето на титулата во првата лига.
Вардар се казнува со парична казна во висина од 15.000 евра поради навредливо скандирање од страна на навивачите и несоодветна прослава на титулата од страна на фудбалерите.
Воедно, Дисциплинската комисија поведе постапка против Вардар поради користење на пиротехнички средства на натпреварот од 33. коло против Шкендија.
