Фудбалската федерација на Македонија соопшти дека се прекинува продажбата на билети за натпреварот в четврток против Латвија и дека влезот на трибините ќе биде слободен за сите граѓани.
Македонија в четврток од 18:00 часот на Националната арена „Тодор Проески“ во Скопје ќе одигра пријателска против Латвија, како подготовка за клучниот мундијалски квалификациски натпревар на гости против Велс во Кардиф.
Иако билетите за овој меч веќе некое време беа во продажба, на два дена пред дуелот ФФМ се премисли и одлучи влезот да биде слободен. Не ги објави причините за овој пресврт, но веројатно слабата продажба е главната причина за овој потег.
„Ова е наш начин да изразиме благодарност до сите поддржувачи за нивната безрезервна поддршка во текот на целата година. Ве покануваме заедно да создадеме уште една убава атмосфера и да им дадеме силна поддршка на нашите фудбалери на последниот натпревар пред домашната публика оваа година и поттик за последниот квалификациски меч против Велс во Кардиф“, соопшти ФФМ.
Фактот што станува збор за пријателска и крајно неатрактивниот противник кој лани гостуваше во Скопје во рамките на Лигата на нации ја натера ФФМ да ги отвори вратите во обид да привлече што повеќе гледачи на 30-илјадниот стадион.
Претходно селекторот Благоја Милевски рече дека доколку би можел не би ја играл оваа пријателска бидејќи е пред важен меч и најави дека шанса ќе им даде на оние со помала минутажа.
ФФМ објави и дека сите оние кои веќе купиле влезница за овој натпревар ќе добијат бесплатен билет за следниот домашен натпревар на репрезентацијата, без разлика дали ќе се работи за бараж за пласман на Светското првенство или за натпревар од друг карактер.
