ФИФА одлучи да направи преседан за финалето на Светското првенство, па паузата помеѓу двете полувремиња ќе трае дури 30 минути, што е сосем невообичаено за натпревар од ова ниво.
Причината за овој потег е големиот музички спектакл што ќе биде организиран за време на полувремето, а се очекува на сцената да се појават светски ѕвезди како Џастин Бибер, Шакира, Мадона, BTS, Burna Boy и групата Coldplay.
Шпанските медиуми истакнуваат дека оваа одлука на ФИФА не ѝ одговара на „Црвената фурија“, која за време на Светското првенство ја градеше својата игра на висок интензитет, брз проток на топката и постојан притисок врз противникот.
Толку долга пауза би можела да го прекине ритамот на играта и да го промени текот на финалето, особено за тимот на Луис де ла Фуенте, кој досега на турнирот честопати ги уништуваше своите ривали токму во периодите кога одржуваше високо темпо.
Организаторите сакаат да го претворат финалето на Светското првенство во најголем спортски и забавен спектакл, но останува прашањето дали таков потег ќе влијае на самите играчи и на текот на најважниот натпревар на турнирот.
Финалето се игра в недела од 21:00 часот по македонско време на „МетЛајф“ стадионот во Ист Радерфорд, предградие на Њујорк. Шпанија вечерва ќе го дознае својот противник откако Аргентина и Англија ќе го одиграат своето полуфинале.
