Претседателот на ФИФА, Џани Инфантино, изјави дека многу швајцарски репрезентативци, и оние што играат сега и оние што играле во минатото, ќе играа за Косово доколку имаа можност.
Имено, во подкаст на Фудбалската асоцијација на Косово, шефот на светската чадор организација се осврна на поврзаноста на оние фудбалери што играат за Швајцарија со земјата во која се родени тие или нивните родители.
Тој верува дека швајцарските репрезентативци Џердан Шаќири и Гранит Џака ќе играа за Косово, а не за Швајцарија доколку ФИФА ја признаеше независноста на Косово порано.
„За многу играчи од Косово кои се родени и израснати во странство, сигурно имаше многу различни влијанија и истории. Како што знаете, многу од нив, кога Косово не беше меѓународно признато, играа за швајцарската репрезентација. На пример, како Џердан Шаќири и други. Тие беа меѓу најдобрите играчи што некогаш можеле да играат за Косово, но Косово во тоа време, за жал, не беше меѓународно признато“, вели Инфантино.
