Како победата на ПСЖ во ЛШ му донесе милиони на Мајкл Џордан?

Со победата над Арсенал во финалето на Лигата на шампионите, ПСЖ не само што ја одбрани европската титула, туку му донесе и значителна заработка на еден од најголемите спортисти на сите времиња. 

Мајкл Џордан (63) на тој начин стана еден од големите победници на финалето што се играше на Пушкаш Арената во Будимпешта, сето тоа благодарение на партнерството на неговиот бренд со парискиот клуб. Триумфот на ПСЖ ќе му донесе огромна сума од повеќе милиони долари.

Победата на ПСЖ, втора по ред во Лигата на шампионите, силно ќе ја зголеми продажбата на дресови и друга клупска стока, што ќе резултира со директна финансиска корист за Мајкл Џордан. Имено, договорот со Најк му гарантира провизија од пет проценти за сите производи што се продаваат со логото Jumpman на неговиот бренд.

Врската на Мајкл Џордан со Париз датира од 1985 година, кога Air ја посети француската престолнина на промотивна турнеја. Соработката помеѓу ПСЖ и компанијата Nike, која го опремува парискиот клуб од 1989 година, е една од најдолгите во европскиот фудбал.

Пресвртницата се случи во 2018 година, кога во партнерството беше вклучен и Jordan Brand. Брендот што Nike го создаде во 1984 година за тогаш најдобриот кошаркар во светот, по 34 години дизајнирање исклучиво кошаркарска опрема, одлучи да направи скок во фудбалот.

Нејмар одигра клучна улога во тоа. Уште во 2016 година, пред да дојде во ПСЖ, Бразилецот потпиша договор за спонзорство со Jordan. Кога пристигна во Париз, носејќи патики со препознатливо лого, тоа го привлече вниманието на партнерите на клубот.

Тие се обратија до подружницата на Nike со цел да го подигнат имиџот на ПСЖ на следното ниво, и се роди уникатен договор. ПСЖ стана единствениот фудбалски клуб во светот што имаше спонзорство од Jordan Brand на своите дресови. Во 2019 година, Nike го обнови својот глобален договор со ПСЖ до 2032 година, вреден 80 милиони евра по сезона.

Оваа сезона, логото Jordan Brand беше користено на четвртиот и петтиот дрес на ПСЖ, кои обично беа резервирани за важни натпревари во француското првенство или големи европски ноќи. По освојувањето на втората последователна Лига на шампиони, специјалниот дрес со натпис „Back2Back“ стана огромен хит и предмет на желба на навивачите на парискиот клуб, што дополнително ќе ја зголеми продажбата, а со тоа и заработката на Џордан.