Манчестер Сити оствари голема победа на „Енфилд“ против Ливерпул. Со неа, не само што успеа да го одржи чекорот со лидерот Арсенал, туку и забележа два триумфа против „Црвените“ во една сезона во Премиер лигата за прв пат по 89 години.
Исто така, за прв пат од 2021 година „Граѓаните“ славеа на гостински терен против тимот што моментално го предводи Арне Слот, што е голем успех.
Сепак, во својата изјава по натпреварот, играчот на Сити, Ерлинг Халанд, го посочи судијата Крег Посон за ситуацијата што практично стави крај на натпреварот.
За потсетување, голманот Алисон берше отиден во напад, па Рајан Шерки шутираше од далечина кон небранетиот гол на Ливерпул, а додека Халанд трчаше кон топката за да ја испрати во мрежата, Доминик Собослаи го повлече. Судијата го поништи голот, му даде црвен картон на Унгарецот и им досуди на „Граѓаните“ слободен удар наместо трет гол.
„Мислам дека судијата мора да ги почитува правилата, но ова ќе му даде на Собослаи суспензија од три натпревари. На крајот, жал ми е за него. Едноставно е - само признај го голот и не давај црвен картон. Но, тоа се правилата и тоа е тоа“, рече Халанд.
Претходно токму Собослаи со еврогол од слободен удар донесе водство за Ливерпул во 74. минута. Точно десет минути подоцна Бернарду Силва израмни на асистенција на Халанд, а Норвешанецот во 3. минута од надополнувањето реализираше пенал за пресврт и водство на Сити.
Бернарду Силва, исто така, се обрати на медиумите, нагласувајќи ја важноста на синоќешната победа...
„Сите во тимот знаеја дека пораз веројатно ќе значи крај на трката за титулата. Арсенал е сè уште во многу подобра позиција, но ние чувствувавме дека мора да победиме. Има надеж, ќе се бориме до крај“, рече Силва.
Португалецот е горд на победата на својот тим, за која е свесен дека е важна од многу аспекти.
„Беше фрустрирачки на почетокот од сезоната бидејќи не ја завршивме работата како што треба. Среќен сум бидејќи ова е најтешкиот натпревар на гостински терен во Англија. Во моите девет сезони тука, ова е прва победа пред нивните навивачи“, додаде Силва.
