Хаос на крајот од финалето ПСЖ - Челси, бесниот Луис Енрике удри играч

Во финалето на Светското клупско првенство помеѓу ПСЖ и Челси видовме неверојатни сцени на крајот од натпреварот. Главен актер беше тренерот на парискиот тим Луис Енрике, кој физички го нападна играчот на Челси, Жоау Педру, стрелец на еден од головите.

Натпреварот заврши со убедлива победа од 3:0 на англискиот клуб, а тензиите што тлееја во текот на сите 90 минути ескалираа веднаш по последниот свиреж.

Камерите го забележаа моментот кога Енрике, среде општата мешаница на теренот, му се приближи на Педру, го зграпчи и го удри во лицето, предизвикувајќи бразилскиот напаѓач да падне на земја.

Целата ситуација настана по вербална и физичка пресметка меѓу играчите од двата тима, во која учествуваа и други членови на ПСЖ, вклучувајќи го и голманот Џанлуиџи Донарума, кој исто така го нападна Педру.

Инцидентот беше дополнително разгорен од фактот дека натпреварот беше исполнет со груби стартови од страна на играчите на ПСЖ, вклучувајќи и црвен картон за Жуау Невеш од ПСЖ, кој го повлече за коса играчот на Челси, Марко Кукуреља.

Енрике се обиде да ги оправда своите постапки тврдејќи дека сакал да ги „раздели играчите“.

„Се обидов да ја смирам ситуацијата. Некој мора да преземе одговорност и да ги смири тензиите. Но, ова е ситуација што сите моравме да ја избегнеме. Тоа се подразбира. Мојата намера беше да ги разделам играчите за да не се влоши ситуацијата“, рече Енрике.

Сепак, снимката јасно покажува дека станува збор за директен физички напад, за кој шпанскиот стручњак може да се соочи со сериозни последици. Се очекува ФИФА и организаторите на турнирот да поведат дисциплинска постапка против тренерот на ПСЖ, кој веројатно ќе се соочи со суспензија.

Челси го освои трофејот со головите на Палмер (2) и Жоау Педру, а по Конференциската лига се закитија со уште еден трофеј оваа сезона.