Манчестер јунајтед се согласи да го позајми Расмус Хојлунд на Милан, но договорот сè уште не е дефинитивно склучен.
Данскиот напаѓач стана вишок на „Олд Трафорд“ откако во клубот дојдоа Матеуш Куња и Бенјамин Шешко. Милан веднаш покажа сериозен интерес за Хојлунд, кој има искуство во Серија А откако сезоната 2022/2023 ја играше во дресот на Аталанта. Тогаш на 32 натпревара постигна 9 голови, како и 1 гол на 2 настапа во Копа Италија.
Според „Газета дело Спорт“, се очекува челниците на Јунајтед на официјален состанок да му соопштат на Хојлунд дека е вишок во тимот, а потоа треба да се пресели на „Џузепе Меаца“.
Манчестер е подготвен 22-годишниот напаѓач да го испрати на позајмица, а двата клуба сè уште не го дефинирале моделот по кој Хојлунд би се преселил во италијанскиот гигант.
Сигурно е дека по завршувањето на сезоната Милан ќе мора да го откупи неговиот договор од Манчестер Јунајтед. Според медиумите станува збор за сума од околу 35 милиони евра.
