Клупскиот мундијал згаснува по само едно издание? Чеферин и Ал-Хелајфи подготвуваат нешто...

Фудбалската сцена влегува во нова фаза од конфликтот меѓу европските клубови и ФИФА, а Александер Чеферин и Насер Ал-Хелајфи се во центарот на вниманието. Претседателот на УЕФА и првиот човек на Европската клупска асоцијација (ЕФЦ) се среќаваат во Салцбург во време кога односите со светската управна организација се сè повеќе затегнати, а една од темите би можела да биде иднината на Светското клупско првенство.

Според информациите од шпанскиот весник AS, во моментов нема договор меѓу ЕФЦ и ФИФА за турнирот планиран за 2029 година. Затоа, во моментов нема официјален бојкот, но јасно е дека европските клубови не се задоволни од моменталниот однос со светската куќа на фудбалот.

Посебен проблем е фактот што некои клубови сè уште не добиле одредени средства што им следуваат по Светското клупско првенство што се одржа во 2025 година. Станува збор за директни плаќања и фондови за солидарност, поради што бројни клубови веќе контактирале со ЕФЦ и побарале дополнителни објаснувања.

Тензиите дополнително се засилија со потегот на претседателот на ФИФА, Џани Инфантино, да продаде дел од комерцијалните права на светската организација на инвестициски фондови. Потегот наиде на силен отпор во Европа, каде што УЕФА ги предводеше критиките и, со поддршка на конфедерациите од Северна и Централна Америка и Азија, изврши притисок за отфрлање на планот.

Европските клубови, собрани во ЕФЦ, која претставува околу 850 од најважните тимови од Стариот континент, едногласно го поддржаа ставот на УЕФА против сегашната политика на ФИФА. Иако сè уште не е донесена конкретна одлука за повлекување од Светското клупско првенство во 2029 година, постојат сè повеќе знаци дека би можел сериозно да се преиспита односот меѓу европскиот фудбал и светската организација.

Во некои кругови, дури се споменува и можноста за формирање алтернативно натпреварување надвор од рамките на ФИФА, што би претставувало еден од најголемите предизвици за постојниот фудбалски поредок.

Средбата меѓу Чеферин и Ал-Хелајфи во Салцбург затоа доаѓа во клучен момент. Исходот од разговорите би можел да покаже дали двете страни ќе најдат заедничка основа или конфликтот меѓу УЕФА и ФИФА ќе се продлабочи уште повеќе.