Фудбалската сезона заврши во Туркменистан, земја со 7,5 милиони жители во Централна Азија. Шампион трета година по ред е ФК Аркадаг, клуб кој е основан во 2023 година и досега е шампион на Туркменистан во секоја сезона.
Она што е уникатно во таа приказна е тоа што Аркадаг има рекорд од 82 победи, 0 нерешени резултати и 0 порази во трите сезони на туркменистанското првенство, колку што се натпреварува. Покрај тоа, тој победи на сите 14 куп натпревари, што го носи неговиот рекорд во Туркменистан на 96-0-0.
На прв поглед, ваквите бројки изгледаат сосема луди, но не е потребно многу истражување за да се заклучи зошто е тоа така. Клубот е основан на 1 април 2023 година од страна на Гурбангули Бердимухамедов, човекот кој беше претседател на Туркменистан од 2006 до 2022 година.
Бердимухамедов често го нарекуваат диктатор поради неговото авторитарно владеење, а ова е поткрепено со фактот дека од 2022 година, претседател на Туркменистан е неговиот син Сердар, кој победи на избори кои се сметаа за нефер и наместени. Гурбангули сè уште има големо влијание врз владата и неговиот син и е претседател на горниот дом на парламентот.
Бердимухамедов го основа Аркадаг непосредно пред почетокот на новата сезона, па трансферниот рок беше извонредно продолжен за Аркадаг да може да донесе играчи. Речиси сите најдобри играчи од Туркменистан се приклучија на клубот, а другите не можеа да се натпреваруваат со него, а покрај сето ова, постојат сериозни обвинувања за местење натпревари.
Аркадаг би го држел и Гинисовиот рекорд за најдолга победничка серија, но Гинис одбива да го признае овој рекорд поради сите горенаведени околности.
Пореална претстава за вистинската сила на Аркадаг може да се добие преку меѓународни натпревари. Шампионите на Туркменистан се натпреваруваат во второто ниво на Азиската Лига на шампиони, а оваа сезона, по пет кола од групната фаза, сè уште не знаат за победа. Имаат четири нерешени и еден пораз, а во последното коло ќе го пречекаат Ал Халдија од Бахреин иа со победа сè уште можат да одат во следната фаза од натпреварувањето.
Минатата сезона, Аркадаг постигна и меѓународен успех, со оглед на тоа што ја освои АФЦ Челинџ Лигата, третото азиско натпреварување по ред, споредливо со Конференциската лига во Европа. Во финалето, тој го победи Преах Кан Реач Свај Риенг од Камбоџа, а претходно ги нокаутира и Ал-Араби од Кувајт и Ист Бенгал од Индија.
