Тренерот на Милан, Сержиу Консејсаун, изјави дека на „Росонерите“ не им е потребна дополнителна мотивација за дуелот со Интер и додаде дека верува во пласманот на неговиот тим во финалето на Копа Италија.
Милан и Интер ќе се сретнат вечерва во реваншот од полуфиналето на Копа Италија, откако на првиот дуел одигран на 2 април на истиот стадион „Џузепе Меаца“ беше 1:1.
„Мотивацијата не доаѓа од противникот, туку од нашата секојдневна работа. За жал, во Серија А веќе немаме шанси, ниту за Лигата на шампионите, и затоа размислуваме само за овој натпревар“, изјави Консејсаун на прес-конференцијата, објави официјалниот сајт на клубот.
Португалскиот стратег призна дека дуелот со Интер е многу важен за Милан.
„Ова е важен натпревар за сите - играчите, клубот и навивачите, и свесни сме за тоа. Милан мора да се бори за Скудетото и Лигата на шампионите, тоа е стандард, и покрај резултатите во претходните сезони. За клуб како Милан е нормално да се биде во финалето на Копа Италија. Му честитам на Интер за резултатите во Лигата на шампионите и првенството, тоа зборува за нивната сила. Но, за нас овој натпревар е суштински, бидејќи сакаме да победиме и да стигнеме до финалето, да им го донесеме трофејот на навивачите“, додаде тренерот на Милан кој како играч две сезони играше токму за Интер.
Италијанските медиуми пренесуваат дека Кајл Вокер и Рубен Лофтус-Чик ќе бидат подготвени за дербито против Интер.
„Вокер тренира со тимот, иако сè уште не е на својот максумум. Но, и тој и Лофтус-Чик ќе бидат во составот“, заклучи Консејсаун.
Дербито дела Мадонина по 29-ти пат ќе се игра во Копа Италија. Милан има 10 победи, Интер има 9, а 9 натпревари завршиле нерешено. Гол-разликата е 35:28 во корист на „Росонерите“.
Севкупно, рачунајќи ги дуелите во сите натпреварувања, ова ќе биде 244-то дерби. Интер има 91 победа, Милан има 81, а 71 меч завршил со реми. Вкупната гол-разлика од 341:319 е во корист на „Нераѕурите“.
