Крај на бајката во Манчестер Сити: Пеп го официјализираше своето заминување

Познатиот каталонски тренер Жузеп Гуардиола официјално го потврди своето заминување од Манчестер Сити, напуштајќи го „Итихад“ по 10 фантастични години.

И клубот и тренерот го потврдија своето заминување на крајот од тековнава сезона откако Гуардиола освои 20 трофеи со Манчестер Сити и ги предводеше до титулите на европски и светски прваци.

Неговиот последен натпревар како менаџер на Манчестер Сити ќе биде против Астон Вила овој викенд.

Каталонецот, кој се приклучи на Сити во јули 2016 година, имаше трансформативно влијание во текот на 10-те години на чело на клубот, а си заминува откако освои 20 големи трофеи, што го прави најуспешниот менаџер во историјата на клубот од „Итихад“.

„Какво време поминавме заедно. Не ме прашувајте зошто си заминувам. Нема причина, но длабоко во себе знам дека ова е моето време. Ништо не трае вечно, ако беше така, ќе бев тука. Она што ќе трае вечно ќе биде чувството, луѓето, спомените, љубовта што ја имам кон мојот Манчестер Сити“, рече Пеп во официјално соопштение денес.

Оваа година Гуардиола не успеа да го освои англиското првенство, кое му припадна на Арсенал и неговиот ученик Микел Артета.

„Работевме. Страдавме. Се боревме. И ги правевме работите на наш начин. Наш начин“, додаде тој, со што стави крај на едно од најуспешните партнерства во модерниот фудбал.

И покрај тоа што ја напушти позицијата менаџер на Манчестер Сити, Пеп ќе го продолжи своето партнерство со City Football Group, преземајќи ја улогата на глобален амбасадор.

Неговата улога ќе вклучува давање технички совети на клубовите на групацијата, работа на специфични проекти и соработки.

Гуардиола има освоено 6 титули во Премиер лигата, 4 ФА купови, 5 Лига купови, Лигата на шампионите, Суперкупот на УЕФА, Светското клупско првенство...