Крај на една ера – Џејми Варди ќе го напушти Лестер

Херојот на Лестер, Џејми Варди по 13 години реши да го напушти клубот. Клупската легенда на социјалните мрежи објави дека по завршувањето на сезоната ќе замине од „Кинг Пауер“.

„Навивачи на Лестер, мразам што дојде овој ден, но мораше да дојде. По 13 неверојатни години во клубот со многу успеси, некои падови, но главно најголеми успеси, време е да се откажам. Уништен сум, но мислам дека е вистинското време. Само сакам да ви кажам големо благодарам што ме прифативте како еден од вас. Лестер секогаш ќе биде во моето срце, сигурно ќе го следам во наредните години и се надевам дека клубот ќе биде успешен. Во овој момент ова е мое збогум, но ќе ме видите наскоро, ви благодарам“, рече Варди.

Варди е веќе бесмртен во очите на навивачите на Лестер, кои засекогаш ќе го паметат како херој во шампионската сезона 2015/2016. Пет години подоцна, тој ги предводеше „Лисиците“ до трофејот во ФА купот, зацврстувајќи го својот статус на најголем играч во историјата на клубот.

Варди доби отказ од Шефилд Венсдеј како 16-годишник, па својот фудбалски пат го започна од дното, од најниските лиги, преку Стокбриџ Парк и Халифакс.

Лестер го донесе Варди од аматерскиот Флитвуд за 1 милион фунти во 2012 година, четири години подоцна беше прогласен за најдобар играч во Премиер лигата, а во сезоната 2019/2020 беше најдобар стрелец.

Иако го посакуваа најголемите европски клубови, тој и во најтешките моменти им остана верен на „Лисиците“, па го водеше тимот минатата сезона кога експресно се врати во Премиер лигата и тоа како шампион на Чемпионшип.

По поразот на домашен терен од Ливерпул со 1:0, Лестер и математички ги загуби шансите да остане во елитата.

За „Лисиците“ постигна 198 голови на 496 натпревари, а доколку настапи во последните четири кола од тековната сезона ќе го напушти клубот со точно 500 настапи.

Иако во јануари наполни 39 години, Варди нема намера да ја заврши кариерата.

 

 

 

 

View this post on Instagram

 

 

 

 

 

 

 

 

 

 

 

A post shared by Premier League (@premierleague)