Леопардите ја намачија Англија, Кејн со два гола донесе осминафинале

Англија до 15 минути пред крајот имаше негатива против ДР Конго, но потоа на сцена стапи Хари Кејн и го продолжи мундијалскиот сон на Англичаните.

По почетниот притисок на англичаните следуваше студен туш од контра напад во 7. минута. Капитенот Шансел Мбемба нафрли од десно во шестнаесетникот, таму Џед Спенс со глава лошо ја процени топката, зад него налета Брајан Сипенга и со шут по земја веднаш до поблиската статива го матираше Џордан Пикфорд за молк меѓу англиските навивачи на стадионот „Мерседес-Бенц“ во Атланта.

Англија имаше одлична можност за израмнување во 35-тата минута преку Маркус Рашфорд, но неговиот удар од гол-линијата го расчисти Арон Ван-Бисака. Во 42. минута врати Јоан Виса кога по одлично нафрлување од десно играчот на Њукасл Јунајтед ја погоди стативата од англискиот гол.

Во судиското надополнување на првиот дел во главна улога беше Хари Кејн. Прво се обиде да изглуми пенал кога намерно отиде на контакт со голманот Лионел Мпаси, а јорданскиот судија Адам Махадме и по ВАР проверка не потпадна на измамата на англискиот голгетер. Потоа имаше колосална шанса кога од петерецот биеше директно во Мпаси.

Шест минути по паузата се закани Рашфорд кога шутираше од лево, но Мпаси повторно одлично го обрани конгоанскиот гол. Но, не можеше истото да го направи во 75-тата кога нововлезениот Ентони Гордон од десно му сервираше на Кејн пред петерецот, а на искусниот лисец непречен од никого му беше прелесно да погоди за израмнување.

Кејн дефинитивно се рзбуди и во 86. минута се погрижи за комплетен пресврт. Откако Белингам промаши зицер откосо лево, односно Мпаси му одбрани, Гордон ја зеде топката, додаде до Кејн, овој си отвори простор за удар и заби во голот на ДР Конго. Кејн со денешните два гола има вкупно 5 на Мундијалот.

Меч топка за израмнување имаше Виса во 6. минута од надополнувањето, но од изгледна позиција од слободен удар го префрли голот.

Популарните „Леопарди“ по овој пораз се пакуваат за дома, но можат со кренати глави да си заминат оти не разочараа, ги освоија симпатиите со добрата игра како денес така и во групната фаза и целокупно оставија одличен впечаток.

Во осминафиналето Англија ќе игра против кодомаќинот Мексико. Натпреварот е закажан за 6 јули во 2 часот по полноќ на „Астека“ стадионот во Мексико Сити.