Цуркус е единствениот збор што може да се употреби за да се опише зимскиот трансфер период во редовите на скопски Вардар, а за тоа е виновен нивниот најдобар фудбалер - Угандиецот Роџерс Мато.
Откако синоќа лидерот во шкотската Премиер лига, Хартс оф Мидлотиан, објави дека клубот постигнал договор со Мато за него трансфер на лето откако ќе му истече договорот со Вардар на 30 јуни, сега Вардар објави дека ја прифатил милионската понуда на Спортинг Канзас Сити за трансфер на Мато уште во овој јануарски преоден рок.
„ФК Вардар АД реши да ја прифати милонската понуда од екипата на Спортинг Канзас Сити од Канзас, САД. Клуб што се натпреварува во најсилната МЛС фудбалска лига во САД. Останува сега Канзас и Мато да ги договорат условите под кои тој ќе настапува таму. За очекување е плата од околу 40.000 долари месечно, плус бонуси. Овој трансфер воедно ќе ѝ помогне и на струмичка Брера, која според договорот полага право на 20% од продажбата“, објави Вардар на својата официјална веб-страница.
„Со задоволство објавуваме дека постигнавме договор со напаѓачот од Уганда, Роџерс Мато, да стане играч на Хартс на лето“, стои во синоќешното соопштението на Хартс, кој додаде и дека со Мато се договориле за 3-годишен договор.
Останува да видиме како ќе заврши овој вардаров циркус, со оглед на тоа што, како што пренесуваат некои домашни спортски медиуми, Мато воопшто не се појавил на тренинзите на Вардар и не ги искористил ни авионските билети кои клубот му ги обезбедил за од Уганда да стигне во Анталија.
Договорот на Мато со Вардар истекува на 30 јуни и доколку клубот не го пртодаде сега ќе го загуби без отштета. Според Transfermarkt, вредноста на Мато изнесува 700 илјади евра. Хартс имаа понуда уште сега да го купат, но таа изнесуваше само 350 илајди. Вардар одлучи да ризикува, па иако ја прифатил понудата на Американците, на крајот фудбалерот одлучува каде ќе оди. Најдобро за Вардар би било Мато да замине во МЛС за кллубот да добие одлична сума, која и тоа како му е потребна по финансиските проблеми кои со години го мачеа.
За потсетување, Мато со Уганда учествуваше на Африканскиот куп на нации кој моментално се одржува во Мароко, а неговата репрезентација испадна во групната фаза. Мато постигна еден гол.
Сезонава играше одлучно во првата лига постигнувајќи 12 голови во 13 натпревари, а додаде и 2 асистенции. Постигна и 3 гола летоска во квалификациите за Конференциската лига. За репрезентацијата на Уганда има 41 натпревар и 8 голови.
